Günlər bir-birini izləyir. Həqiqətən elə izləyir ki, öndəkinin izindən ayrılmaqda inad edir. Və izlədikcə bir-birini bu günlər, karvan ömür sərmayəsini belinə alıb aparır. Onlar daşıdıqca dəvələrə hücum edib bir şeylər qapmağa çalışırsan. Karvan sahibi heç nəyi savaşmadan vermək fikrində deyil. Amma silahın varsa başqa məsələ. Əslində silahı da elə ondan almısan. Öz silahından hər kəs çəkinir. Bir də silahsızlar var bu dünyada. Dilənməkdən başqa bir şey gəlmir əllərindən. Karvanın artıqlarını yeyərək bunu başqalarına üstünlük kimi qələmə verirlər. Əllərində imkan olsa karvanı çapıb talayarlar.
